Jagdip Nanavati
ખંજર બની અરસ પરસની પાર હોય છે
દુનિયાના લોક કેવા મિલનસાર હોય છે

પડઘાને ધ્યાન દઈને જરા સાંભળી જુઓ
પર્વતની હર વ્યથાઓ વિગતવાર હોય છે

એના વિના વજુદ રતિભાર પણ નથી
મરહમ, સદા ઝખમનો કરજદાર હોય છે

મયખાનુ લાખ ચાહે પિવાડો છતાં, નજર
સાકીની એક તીરછી, અસરકાર હોય છે

ગીતાનો સાર એટલોજ કે, મુગટ તણું
પીંછુયે કો’ક વાર વજનદાર હોય છે

જીવવાની ભોગવી છે સજા, તોય બાંધતા
જાણે હજીયે સખ્શ ગુનહગાર હોય છે